🥇 जिद्द आणि परिश्रमाचं अद्भुत रसायन 'हिमा दास'

Rajmudra IT | Motivation

ढिंग एक्स्प्रेस नावाने प्रसिद्ध असणाऱ्या हिमा दास या धावपटूने एकाच महिन्यात तब्बल पाच सुवर्णपदकांची कमाई करून भारताची मान जगभरात उंचावली आहे.

आज तिला कुणी 'गोल्डन गर्ल' तर कुणी 'उडनपरी' म्हणून संबोधत आहे. अत्यंत प्रतिकूल परिस्थिती असताना जिद्द आणि अथक परिश्रमाच्या जोरावर तिने हे अभूतपूर्व यश संपादित केले आहे. आज तिच्या या प्रेरणादायी प्रवासाविषयी जाणून घेऊया...

⚽ फुटबॉलपासून सुरुवात: आसाम राज्यातील नागाव जिल्ह्यातील धिंगजवळ असलेल्या कंधुलिमारी गावात हिमाचा जन्म झाला. हिमाचे आईवडील भातशेती करतात. हिमाने अगदी लहानपणापासूनच फुटबॉल खेळायला सुरुवात केली. हिमा आपल्या गावात किंवा जिल्ह्यात छोट्यामोठ्या फुटबॉल मॅचेस खेळून 100-200 रुपये जिंकायची. यातूनच तिला पुढे धावण्यासाठी लागणारे मैदानी गुण विकसित झाले.

💪🏻 मेहनती आणि धैर्यशील: हिमा लहानपणासून जिद्दी आणि संयमी होती. शेतातील काम असो कि, कुणा आजारी व्यक्तीला दवाखान्यात न्यायचं असो हिमा सर्व काम पद्धतशीरपणे करायची. परिस्थितीपुढे न झुकता हिमाने खंबीरपणे मिळवलेले यश हे निर्विवाद आहे, असे हिमाचे वडील रणजित दास सांगतात.

💫 प्रतिकूल परिस्थितीत यश: हिमा एकदा एका कॅम्पसाठी गुवाहाटीमध्ये आली असताना तिचे प्रशिक्षक निपुण दास यांनी तिच्यातील धावपटू हेरला. आणि तिला गुवाहाटीला प्रशिक्षणासाठी पाठवा अशी विनंती त्यांनी हिमाच्या आईवडिलांना केली. आर्थिक परिस्थिती पाहून शेवटी दास यांनीच हिमाचा सर्व खर्च करण्याची तयारी दर्शवली.

🎯 अडचणीच बनल्या बलस्थान: हिमाकडे धावण्यासाठी हवे असलेले बूट देखील नव्हते. मात्र आज हिमाने आपल्या कर्तृत्वाची दखल पूर्ण जगाला घ्यायला भाग पाडले. 'Adidas' या जगप्रसिद्ध शूज ब्रँडने देखील हिमादास नावाच्या शूजची निर्मिती केली यावरून तिच्या कर्तृत्वाची प्रचिती येते.

💁‍♀ सामाजिक उत्तरदायित्व : यशाने कधीच हुरळून न जाता हिमाने नेहमी समाजाप्रती असलेले उत्तरदायित्व कायम निभावले. आसाममध्ये सध्या पूरग्रस्त स्थिती असतानाच हिमाने आपल्या वेतनातील अर्धे वेतन हे पुरग्रस्तांसाठी मुख्यमंत्री सहाय्यता निधीत देऊ केले आहे. तसेच तिच्या विविध सामाजिक कार्याचे सोशल मीडियावर नेहमी कौतुक होत असते.

👉🏻 आत्तापर्यंतची कामगिरी :

▪ फिनलँड येथे जुलै 2018 मध्ये झालेल्या 20 वर्षांखालील जागतिक अ‍ॅथलेटिक्स स्पर्धेत 400 मीटर धावण्याच्या स्पर्धेत हिमाणे सुवर्णपदक मिळवले. असे करणारी ती पहिली भारतीय महिला ठरली.
▪ इंडोनेशिया येथे 2018 साली भरलेल्या आशियाई क्रीडा स्पर्धेत 400 मीटर धावण्याच्या शर्यतीत हिमाने रौप्य पदक मिळवले.
▪ इंडोनेशिया येथे 2018 मध्ये झालेल्या आशियाई क्रीडा स्पर्धेत प्रथमच समावेश करण्यात आलेल्या मिश्र रिले स्पर्धेत हिमा दासच्या संघाने रौप्य पदक मिळवले.
▪ इंडोनेशिया येथे 2018 मध्ये भरलेल्या आशियाई क्रीडा स्पर्धेत महिला रिले या प्रकारात हिमा दासच्या संघाने सुवर्णपदक पटकावले.

🏆 हिमा दासची क्रीडाविश्वातील अप्रतिम कामगिरी बघून भारत सरकारने 2018 मध्ये हिमाला 'अर्जुन पुरस्कार' हा  क्रीडा क्षेत्रातील सर्वोच्च पुरस्कार प्रदान केला होता.